Mae Grŵp Ymchwil Addysg a Chyfiawnder Cymdeithasol Caerdydd yn canolbwyntio ar bob math o anghydraddoldebau addysgol, gan gynnwys effaith tlodi ar gyrhaeddiad addysgol, gwrth-hiliaeth, anghenion dysgu ychwanegol a datblygu ysgolion sy'n canolbwyntio ar y gymuned. Mae ganddynt ddiddordeb ar draws y sbectrwm addysg a dysgu gydol oes a'r rhyngweithio rhwng addysg a chymdeithas yn fwy cyffredinol. Mae’r ffocws ar ymchwil sy’n agos at ymarfer sydd â'r potensial i effeithio ar bolisi ac ymarfer.

Er mai'r cyd-destun uniongyrchol ar gyfer gwaith y grŵp yw'r system addysg yng Nghymru, mae gan y grŵp ddiddordeb mewn cyd-destunau ehangach yn y DU ac yn rhyngwladol ac mae'n ceisio dylanwadu ar wybodaeth ac ymarfer yn y meysydd hynny.

Bydd y grŵp yn mabwysiadu dull rhyngddisgyblaethol gydag aelodau'r grŵp o ystod o ddisgyblaethau academaidd a meysydd arbenigol. Mae partneriaethau allanol wedi'u ffurfio gyda sefydliadau academaidd blaenllaw, gan gynnwys Prifysgol Glasgow, cyrff polisi fel y Sefydliad Gwaddol Addysg a sefydliadau'r sector ac awdurdodau lleol yng Nghymru.

Bydd y grŵp yn mabwysiadu dulliau cymysg o ymchwil, gan ddefnyddio ystod o ddulliau meintiol ac ansoddol wrth gynnal astudiaethau sy’n agos at ymarfer. Mae gan y grŵp arbenigedd mewn ystod o feysydd arbenigol gan gynnwys ymchwil ar oresgyn effaith tlodi ar gyrhaeddiad, ysgolion sy'n canolbwyntio ar y gymuned, anghenion dysgu ychwanegol, cyflawniad pobl dduon a lleiafrifoedd ethnig, a llesiant dysgwyr.