Wedi'i sefydlu yn 2019, mae'r Ganolfan Diwydiant 4.0 ac Ymchwil Blockchain (CI4BR) wedi dod i'r amlwg fel hwb blaenllaw ar gyfer arloesi, gan yrru datblygiadau wrth integreiddio technolegau sy'n dod i'r amlwg fel AI cynhyrchiol, golwg cyfrifiadurol, blockchain, a gefell ddigidol i hwyluso trawsnewidiadau Diwydiant 4.0 a Gofal Iechyd 4.0.  

Thema Trawsnewid Diwydiant 4.0: Drwy gyllid fel Partneriaeth Trosglwyddo Gwybodaeth (KTP) Innovate UK, cronfeydd Partneriaeth Glyfar Llywodraeth Cymru, mae'r CI4BR wedi ymgymryd â nifer o brosiectau partneriaeth rhwng y byd academaidd a byd diwydiant gyda busnesau bach a chanolig o wahanol sectorau i fynd i'r afael â heriau awtomeiddio gweithredol, gwella effeithlonrwydd, arbedion costau ac addasu technolegol. Mae'r ganolfan hefyd wedi cydweithio ag arweinwyr diwydiant byd-eang, gan gynnwys Airbus a Google DeepMind, yn ogystal â sefydliadau'r llywodraeth fel Tŷ’r Cwmnïau, i ddarparu atebion effeithiol. 

Thema Trawsnewid Gofal Iechyd 4.0: Mae CI4BR wedi ymgymryd â nifer o brosiectau â chryn effaith, mewn cydweithrediad â'r Gwasanaeth Iechyd Gwladol (GIG) a darparwyr gofal cymdeithasol fel Age Connects, gan ganolbwyntio ar glefydau anhrosglwyddadwy fel pwysedd gwaed uchel, dementia ac iselder. Mae'r ganolfan wedi datblygu offer arloesol i fynd i'r afael â heriau economaidd-gymdeithasol, gan gynnwys atebion i wella’r modd i bobl gadw at feddyginiaethau, rhwydweithiau rhithwir cymorth cymheiriaid ar gyfer gofal dementia, a systemau monitro o bell ar gyfer Gwasanaethau Iechyd Meddwl Plant a'r Glasoed (CAMHS). 

Thema Blockchain a Cryptoarian: CI4BR yw'r ganolfan ymchwil gyntaf o'i math yng Nghymru, sydd â chyfarpar gosodiadau waled crypto a nod pob pen i ymgymryd â datblygu offer ac apiau sy'n seiliedig ar gyfriflyfr dosbarthedig. Mae'r ganolfan hefyd yn ymchwilio i Crypto Fforensig, Arian Digidol Banc Canolog (CBDC), a Sefydliad Ymreolaethol Datganoledig (DAO).

Thema Golwg Cyfrifiadurol: Mae gan y ganolfan arbenigedd helaeth gyda dadansoddi delweddau, yn enwedig delweddau meddygol (MRI, CT) gan ddefnyddio algorithmau golwg cyfrifiadurol o'r radd flaenaf.

Prentisiaethau ac Addysg Entrepreneuraidd: Bu’r ganolfan yn arloesol wrth sefydlu Rhaglen Gradd Prentisiaeth Gwyddor Data yng Nghymru a sefydlodd hefyd raglen interniaeth haf menter sy'n canolbwyntio ar dechnoleg ariannol.  

Gyda gwerth dros £3 miliwn o incwm grant, mae gwaith arloesol CI4BR wedi ennill cryn gydnabyddiaeth, gan gynnwys Gwobr Technoleg Cymru am y Cais Blockchain Gorau a'r Wobr Longitude ar Ddementia. Mae ymchwil gan y ganolfan hefyd wedi cyrraedd y rhestr fer ar gyfer Gwobr KTP Innovate UK a Gwobr Cynnwys Cymdeithas Alzheimer, gan danlinellu ei hymrwymiad i yrru arloesedd a chreu effaith gymdeithasol diriaethol.

Cydweithwyr Diwydiannol: Airbus, Google DeepMind, Satori Lab, Window Cleaning Warehouse, Market Mate, Coin Cover, Business Butler

Cydweithwyr Llywodraeth: Swyddfa'r Ystadegau Gwladol (SYG), Tŷ'r Cwmnïau 

Cydweithwyr Iechyd/Gofal Cymdeithasol: Bwrdd Iechyd Prifysgol Cwm Taf, Age Connects, Balsamee